أسرار الأرقام لدى السوريين…

للأرقام دلالات عند السوري، فيستخدم بعض الأرقام معبراً ودالاً على شيء أو فكرة مثلاً:

-الرقم (60):يُستخدم حصرياً في الشتائم والتوبيخ والبهدلة وكأنه سلاح اللسان مختلفًا عن باقي الأرقام.

مثلاً: (ابن ال60 صرماية).. (ابن 60 كلب).. لا يقال مثلاً ابن 50 كلب.. ولا ابن 70 كلب.. حصراً 60 كلب فقط لا غير.

كما يستخدم الرقم (60) للتعبير عن الغضب و وصف أسوأ مكان أو وجهة.

مثلاً: (انقلع حدّك 60 جهنم).. أو (تروح في 60 داهية).. 30 أو 80 ما بيمشي الحال.

-أما الرقم (100) فله استخدام مختلف ومخصص للتسليمات.

مثلاً: (يا 100 أهلا وسهلا).. مامنقول يا 40 أهلا وسهلا.. لأ..

(100 السلامة).. (100 وردة بهالطلة)..

وببعض الأحيان يستخدم رقم (100) للمبالغة:

(100 مرة قلتلك لا تعمل هيك).. هو بكون قايله مرة أو مرتين..

(100 مرة ناديتلك).. هي بتكون 3 مرات أيضاً..

– نصل إلى الرقم (10) فهو مخصص لوصف جودة الأشياء أو حسن الأفعال.

(الشغل 10 على 10).. تأتي بمعنى رائع..

أو (خلّي عيونك 10 على 10) يعني انتبه..

-أما الرقم (1000) فيستخدم خصيصًا للتهنئة.

(1000 مبروك).. 200 مبروك ما بيمشي الحال.. حصراً 1000..

(1000) الحمدلله عالسلامة..

– أما الرقم (7) فهو أيضاً لوصف ظاهرة غريبة جداً.. ويفيد الحيرة الشديدة أو البحث المتواصل والمضني عن شيء أو شخص ما. مثلاً:

(دخت ال7 دوخات لحتى لقيته لفلان أو لهالغرض الخ…).

ويستخدم الرقم (7) أيضًا للتعبير عن النوم العميق..

(ما رح يرد عليك.. شكلو ب “سابع” نومة)..

انتبه.. لو ب “خامس” نومة كان فاق وقام عادي ورد.. بس هاي السابع نومة عميقة!

أخيراً الرقم (٢):

وهو يعبر عن أطول مدة زمنية في العالم.. وهي (الساعتين).

(صرلو ساعتين بنفس القصة) هي بتكون 4 دقايق.. بس الله ببارك فيهن..

(صرلي ساعتين ناطر).. ( الي ساعتين عم فهمك هالشغلة وأنت متل الحيط)..

(هلكت صرلي ساعتين واقف ع رجليي)..

فهل للأرقام دلالات أخرى في اللهجات العربية لدى أخوتنا العرب؟